WILLEMSTAD - Gobierno di Corsou a nombra Banco di Caribe como e nobo banco di cas pa gobierno. Esaki ta nifica cu e banco lo bira responsable pa maneho di varios cuentanan bancario y transaccionnan financiero di gobierno.

ORANJESTAD – Durante e bolsa di balor turistico ITB na Berlin e siman aki, e medio britanico Breaking Travel News durante un entrevista, a puntra e CEO di Aruba Tourism Authority  Ronella Croes, entre otro, con e ta haya e balansa entre crecemento turistico di Aruba y proteccion di medio ambiente. 

AMSTERDAM - Un operacion grandi contra un red internacional di trafico di droga cu tabata liga na e cartel ecuatoriano Los Lobos, a resulta den dieseis arresto na Hulanda, Belgica y Ecuador despues di varios buskeda den cas. Asina Europol a comunica. E operacion a wordo lidera door Ecuador y Merca, cu apoyo di Europol y autoridadnan di Hulanda y Belgica. Los Lobos ta un di e cartelnan di droga mas grandi na Ecuador y ta involucra den contrabando di cocaina bay pa Merca y Europa. Durante e buskedanan, autoridadnan a arresta tambe un lider importante di e cartel. Ademas, durante e operacion a confisca cuater arma di man, dos rifle, diesiete vehiculo y un suma di mas o menos 685.000 euro. Cuatro sospechoso mas lo wordo yama mas dilanti pa interrogatorio, segun Europol.

WILLEMSTAD/PHILIPSBURG – Centrale Bank van Curaçao en Sint Maarten (CBCS) a anuncia e nombramento di Sra. Nicole Marlin como Director di su oficina na Sint Maarten, entrante 1 di april 2026. E nombramento ta sigui un proceso di reclutamento cu a wordo haci cuidadosamente, den consulta cu e Supervisory Board.

WASHINGTON - E demanda mundial pa pasashi di buelo a crece cu 3,8 porshento na januari 2026 compara cu un aña pasa. Esey ta sali for di datonan nobo di asociasion di International Air Transport Association (IATA). E capacidad a aumenta cu 3,5 porshento, mientras cu e grado di ocupacion a yega na 82,0 porshento, un record pa e luna di januari. E demanda pa destinacionnan internacional a crece cu 5,9 porshento, cu un aumento di capacidad di 5,8 porshento. E grado di ocupacion a yega 82,5 porshento. Riba mercado domestico, e crecemento a keda limita na 0,1 porshento, mientras cu capacidad a baha cu 0,4 porshento. E grado di ocupacion a subi na 81,2 porshento. Segun IATA, e comparacion cu januari 2025 ta un poco distorciona pasobra Aña Nobo Chino a cay den februari e aña aki, mientras cu e aña pasa el a cay na januari. E periodo di fiesta normal ta causa un pico extra den demanda. Loke a salta na bista ta cu e crecemento na Europa (+6,4 porshento) tabata mas fuerte cu na Merca (+3,4 porshento).

DEN HAAG - Durante e ultimo tres dianan, mas pais, uno tras otro a bira involucra den e nobo guerra den Medio Oriente, no solamente den region di Golfo, pero tambe na Europa. E pregunta ta te unda ta inevitabel cu nan lo wordo hala aden den e conflicto aki. Profesor di estudio di guerra, Frans Osinga, no ta spera cu e paisnan di Golfo lo hunta activamente cu Merca. “Merca no tin mester di esey i lo solamente haci coordinacion mas dificil, pero nan ya ta involucra pasobra e franja di Hormuz ta wordo amenaza, mescos cu diferente ciudadnan. Tambe lo tin ciudadano cu lo perde nan bida.”