Pasahero Mericano y Frances di Hondius a test positivo pa hantavirus

OMAHA - Pasaheronan Mericano y Frances abordo di crucero Hondius a test positivo pa hantavirus. E pasahero Mericano no tabata mustra sintomanan di e virus, segun autoridadnan di salud di Merca.

Un otro pasahero Mericano tabatin sintomanan leve di hantavirus. Nan dos, hunto cu diescinco otro Mericano, a wordo transporta den avion pa Omaha, Nebraska. E Mericano cu a test positivo awor ta bay pa un institucion specialisa di salud.

E pasahero Frances a cuminsa haya kehanan durante e buelo rumbo pa cas. Segun minister di salud Frances, condicion di e dama ta empeorando. Na total tabatin cinco pasahero Frances abordo di Hondius. Tur lo bay den aislamiento y lo wordo testea.

Cuarentena na cas

E crucero Hulandes tabata cu cerca di 150 persona den rumbo for di Argentina pa Cabo Verde. Durante e trayecto, varios persona a bira malo y tres a fayece. Nan a resulta infecta cu hantavirus.

Despues di esey, e barco a tira ancla banda di costa di Cabo Verde. Tres pasahero a wordo evacua aya, di cual dos tabatin kehonan. E di tres tabatin contacto estrecho cu un pasahero cu a fayece.

Despues di e evacuacion, e barco a sigui rumbo pa Tenerife cu resto di pasaheronan. E la yega mainta temprano ayera na haf di Granadilla de Abona. Pasaheronan a wordo testea pa hantavirus y despues transporta den grupo pa aeropuerto cercano.

Un avion cu ocho Hulandes y pasaheronan di dies otro pais a bula ayera rumbo pa Eindhoven. E Hulandesnan mester pasa seis siman den cuarentena na cas.

“NO TA UN   COVID-19 NOBO”

No tin motibo pa panico grandi, segun director di OMS, Tedros Adhanom Ghebreyesus. “Esaki no ta un covid-19 nobo. Y e riesgo pa publico general ta abou”, e la bisa.

Conseho di OMS ta pa pasa 42 dia den cuarentena, sea den un institucion di salud of na cas. Segun director di OMS, cada pais individual mester dicidi con nan lo maneha e pasaheronan. “Naturalmente nos ta duna conseho na paisnan, pero nos no ta impone obligacionnan”, el a bisa.