Restauracion di Fort Zoutman ta avanza segun planificacion

ORANJESTAD – E trabounan di restauracion na Fort Zoutman ta avanzando segun planificacion y un parte importante di e proyecto mester keda completa ainda prome cu final di 2026, segun Monumentenbureau Aruba.

PATRIMONIO CULTURAL

Fort Zoutman y Torre Willem III ta considera e monumentonan historico mas bieu di Aruba y forma un parti esencial di patrimonio cultural di e isla. E restauracion ta forma parti di e esfuerzo di gobierno pa preserva patrimonio historico y fortalece turismo cultural.

TRABOU TECHNICO

Actualmente, diferente trabounan tecnico y structural ta tumando lugar. Entre nan ta mehoracion di sistema electrico den colaboracion cu Elmar, restauracion di elementonan original di construccion y trabou na e parti mas halto di Torre Willem III.

RENOBACION 

Tambe ta renova of reemplasa bentahanan y portanan, manteniendo e caracter historico y autenticidad di e monumento. Segun director di Monumentenbureau Aruba, Raul Gei, e restauracion ta wordo ehecuta cu gran cuido pa preserva e balor historico di Fort Zoutman.

PROYECTO DEN TRES FASE

E proyecto di restauracion ta dividi den tres fase. E prome fase ta concentra riba restauracion di Torre Willem III. Despues lo sigui e trabounan na Fort Zoutman mes. Den e di tres fase, ta contempla construccion di un edificio nobo na e area unda actualmente tin e bar. Cu e proyecto aki, Aruba ta sigui inverti den preservacion di su patrimonio historico pa beneficio di futuro generacionnan y pa fortalece e atractivo cultural di e isla.