Prome minister britanico Starmer no kier bay apesar di presion grandi pa renuncia

LONDRES – Prome minister britanico Keir Starmer no kier renuncia, apesar di e presion grandi den su propio partido y hasta dentro di su gabinete pa e laga su puesto. Despues di un reunion di gabinete, Starmer a bisa cu e pais ta spera cu gobierno sigui gobernando, y cu e ta pensa sigui haci esey.

Starmer tambe a bisa cu e proceso dentro di Partido Labour pa escoge un lider nobo ainda no a cuminza oficialmente. Pa un candidato por drenta den e proceso, e mester haya apoyo di por lo menos 20% di e miembro nan di Parlamento, y despues tambe apoyo di 5% di e departamentonan local di partido.

Despues di e derrota electoral enorme di Labour siman pasa, hopi hende tabata pensa cu posicion di Starmer no por tabata sostenibel mas. Sinembargo, e ta nenga di bay, argumentando cu su salida lo crea caos politico atrobe den Reino Uni.

Starmer a bira prome minister dos aña pasa despues di un victoria historico pa Labour, prometiendo estabilidad despues di e añanan turbulento despues di Brexit. Pero su popularidad a baha rapidamente debi na varios decision politico cu no a resulta bon, problema economico y controversia rond di nombramento di Peter Mandelson como embahador pa Merca.

Den ultimo dianan, e yamada pa Starmer renuncia a bira mas fuerte dentro di e partido di Labor. Mas cu ochenta di e 412 parlamentario di partido a pidi pa e laga un otro lider tuma su lugar.

Segun media britanico, algun minister tambe a pidi Starmer pa anuncia un calendario pa su salida, loke lo habri caminda pa un lider nobo bira prome minister sin necesidad di eleccion general. Na Reino Uni, e siguiente eleccion nacional no mester wordo haci te 2029.

Awor e pregunta principal ta si Starmer por logra tene su gabinete hunto. Awe, minister Fahnbulleh di Comunidadnan a renuncia, criticando cu Labour no a cumpli cu loke a promete votadornan dos aña pasa. Tambe varios asesor di gabinete a laga nan puesto.

Mañan, Rey Charles lo habri oficialmente e aña parlamentario cu un discurso unda cu e ta spera di anuncia varios plannan ambicioso di gobierno.