Aeropuerto ta alerta pa posibel retraso den vuelonan cu Merca

ORANJESTAD — Aruba Airport Authority (AAA) a emiti un aviso di biahe diabierna, 13 di november, alertando cu vuelonan entre Aruba y Merca por enfrenta retraso, cambio di horario of cancelacion, despues cu autoridad di aviacion americano FAA a ordena un suspension nacional di salida di vuelonan.

Segun informacion publica pa Reuters, FAA a tuma e medida pa motibo di seguridad, despues di problemanan serio di comunicacion den control di trafico aereo. Avionnan cu ya tabata den aire por a sigui aterisa, mientras cu vuelonan internacional cu destino Merca lo wordo evalua caso pa caso.

Secretario di Transporte americano Sean Duffy a informa cu e problema di comunicacion ta afecta e centronan regional cu ta dirigi trafico aereo entre aeroportonan. Tecniconan di FAA ta investiga e fayo.

Den su comunicado, AAA ta indica cu e ta sigui e desaroyonan di cerca y ta coordina cu companianan aereo y autoridadnan relevante pa evalua e posibel consecuencia pa operacion na Aruba.

AEROPUERTO DI ARUBA TA SIGUI OPERA

AAA ta enfatisa cu Aeropuerto Internacional Reina Beatrix ta keda operacional. E aviso no ta anuncia un ceramento di aeropuerto, pero ta adverti pa posibel interrupcion den conexionnan cu Estados Unidos. Pasaheronan cu ta biaha pa of for di un destino americano ta wordo conseha fuertemente pa verifica e status di nan vuelo directamente cu nan compania aereo prome cu nan sali pa aeropuerto. Ademas, AAA ta pidi pasaheronan pa sigui e canalnan oficial di aeropuerto y di nan compania aereo, y respeta e instruccionnan tocante horario di vuelo y cualkier cambio den arreglo di biahe.

E comunicado di AAA no ta specifica ainda cuanto vuelo entre Aruba y Merca a wordo afecta, ni ta confirma cancelacionnan individual. E impacto concreto riba cada vuelo mester wordo verifica cu e compania aereo correspondiente.