Tirado na Correspondents' Dinner acusa pa intento di asesinato riba presidente Trump

WASHINGTON - E homber cu a purba di pasa e seguridad na Correspondents' Dinner ta sospecha di intento di asesinato riba presidente Trump. E la keda arresta diasabra y awe a ser presenta dilanti di huez. Tambe e ta acusa pa a viola ley di arma.

Segun fuente di polis di agencia di prensa AP, ta trata di Cole Allen, un homber di 31 aña, maestro y desaroyado di video game for di ciudad Torrance na sur di California. Segun informacion anterior, lo acuse pa un atake contra gobierno di Trump, pero esaki a cambia awor pa intento di asesinato riba e presidente americano.

Allen no tin antecedente penal, segun uno di e abogadonan cu ta defendele. Tambe a enfatisa cu e sospechoso ta inocente te ora su culpabilidad ta comproba.

VARIOS ARMA

Allen a tira diasabra anochi den e hotel unda e cena tabata tuma luga. Esaki a pasa pafor di e salon grandi unda presidente americano y otro presente tabata sinta come. Poco despues, Trump y vicepresidente Vance a ser saca for di e salon pa agentenan di e servicio secreto.

Otro presentenan, entre nan hopi periodista, a sconde bou di mesa of a busca refugio den otro parti di e salon. E cena a ser cancela y lo wordo organiza di nobo algun momento den e siguiente luna.

Durante e tiramento, fuera di un agente di Secret Service, ningun hende no a resulta herida. Mas despues a bira cla cu e homber tabatin varios arma cu ne, incluyendo un rifle di caza, un pistol y cuchiunan. Tambe e tabatin un chaleca anti bala.

‘ASESINO FEDERAL AMISTOSO’

Poco prome cu e la los e disparonan, segun media americano, e. la manda mensahenan na su famia unda e a bisa cu “ya no ta dispuesto pa laga un pedofil, violador y traidor mancha mi man cu su crimenan”. Tambe, segun fuente di CNN, e la yama su mes “e asesino federal amistoso”.

Autoridadnan americano ta kere cu Allen a biaha pa Washington siman pasa cu trein y despues a registra como huesped den Hilton Hotel, unda e cena a tuma luga. Tambe lo a manda mensahenan na su famia, expresando su sorpresa cu e seguridad tabata deficiente. E seguridad no tabata enfoca riba personanan cu ya tabata den hotel hopi prome cu e evento.

Hilton a indica cu seguridad di hotel tabata organiza pa Secret Service. Segun hotel, e servicio di seguridad a lidera e operacion y ta responsable pa seguridad di presidente. Casa Blanco a bisa cu lo investiga e “protocolonan y practica” di e servicio di seguridad.

RETORICA DURO

Vocero di Cas Blanco, Karoline Laevitt, ta opina cu “retorica politico duro” a contribui na e tiramento. Segun dje, “a crea un clima unda un persona por kier ataka e presidente”.