Caso di hantavirus riba barco crucero Hulandes

AMSTERDAM - Por lo menos tres pasahero  di un barco crucero Hulandes riba Oceano Atlantico a muri pa motibo di un infeccion di caminda di aire, posiblemente despues di un contagio cu hantavirus. Entre e morto tin dos Hulandes, confirma pa un vocero di Ministerio di Asuntonan Externo. Ta trata di un homber di 70 aña y un muhe di 69 aña. Identidad di e tercer victima no ta conoci.  Tres otro persona riba barco tambe a bira malo, segun World Health Organization (WHO). Un di nan, un Britanico di 69 aña, a wordo treci na unidad di cuidado intensivo na Johannesburg. Na e homber aki a confirma hantavirus. WHO ta sospecha cu tur caso ta relaciona cu e virus aki.

TRIPULANTENAN TAMBE AFECTA

Segun e compania Oceanwide Expeditions, e dos otro persona malo ta miembronan di tripulacion. Nan ta ainda riba e barco y tin mester  di cuido medico urgente. E barco   crucero m/v Hondius tabata na caminda for di Ushuaia, Argentina pa Cabo Verde. Awor e ta para banda di costa di Praia. Autoridadnan di Cabo Verde no a duna permiso pa baha e dos tripulante malo. Sin embargo, oficialnan di salud local a bishita e barco pa examina nan. Gobierno Hulandes a bisa cu lo trata di trece nan bek pa Hulanda.

MEDIDANAN DI SEGURIDAD

Ministerio di Asuntonan Externo a aconseha pasaheronan pa keda den nan cabina lo mas posibel y evita contacto cu otro persona.

RUTA DI E BIAHE

E barco a sali dia 20 di maart pa un viaje di 46 dia. Tin espacio pa 170 pasahero, 58 tripulante y 13 guia. Por lo menos 10 Hulandes tabata riba bordo.  E homber Hulandes di 70 aña tabata e prome cu sintomanan y a muri riba barco. Su cadaver a wordo baha na isla Saint Helena, aunke esaki no a wordo confirma oficialmente pa Hulanda. E muhe Hulandes di 69 aña a wordo transporta pa hospital na Johannesburg, unda el a muri despues.