Libertad di prensa mundial ta bayendo atras, pero Hulanda ta subi un puesto

AMSTERDAM - Libertad di prensa mundial ta bayendo malo, segun Index di Libertad di Prensa di Reporters Without Borders (RSF). Hulanda si a logra subi un puesto compara cu aña pasa: awor e ta na di dos lugar, tras di Noruega. Libertad di prensa midi pa tur pais nunca no tabata asina abou. Pa prome biaha den 25 aña cu e index ta wordo publica, mas cu mitar di paisnan ta cay den categoria ‘hopi serio’ of ‘dificil’. Na 2002, e porcentahe ey tabata solamente 13,7 porciento. E desaroyo aki ta preocupante, segun un di e directornan di RSF, Anne Bocandé. “Te con largo nos lo tolera e sufocacion di periodismo, e obstaculizacion sistematico di periodista y e deterioro continuo di libertad di prensa?”, e ta bisa den e raportahe.

ATAKENAN DI PARTIDONAN POLITICO

E posicion bon di Hulanda ta, entre otro, pa motibo di un oferta amplio di medio di comunicacion. Den e raportahe ta para cu na Hulanda, libertad di prensa generalmente ta wordo proteha pa gobierno, pero tambe cu partidonan populista, tanto di extremo drechi como di extremo opuesto, regularmente ta ataca e medionan. No ta menciona un causa directo pa e subida compara cu aña pasa. E index ta wordo determina riba cinco indicador: contexto politico, contexto economico, contexto socio-cultural, marco huridico y seguridad di periodista. Hulanda a score mas halto este aña principalmente riba circunstancianan economico y e marco huridico. E otro categorianan a baha un tiki, pero e diferencia cu aña pasa ta chikito. E raportahe ta menciona un aumento den atakenan fisico y verbal contra periodista, en parte pa motibo di mas polarizacion riba temanan manera migracion y agricultura. Tambe ta indica cu na Hulanda tin riesgo pa violacion di secreto di fuente periodistico, pa motibo di e podernan di servicio di seguridad. Den cierto caso, nan por mira comunicacion y tuma linea di telefon.

MERCA DI TRUMP TA BAHA

Merca durante di dos periodo di presidente Donald Trump a baha shete puesto riba e lista, di 57 pa 64. Syria a subi 36 puesto despues di caida di e regimen di Assad, e subida mas grandi di tur paisnan (di 177 pa 141). Noruega ta keda numero un, mescos cu den añanan anterior. Directora Bocandé ta haci un yamada na pueblo pa para contra e deterioro di seguridad di prensa. “E bala awor ta na democracia y nan ciudadano. Ta na nan pa para den caminda di esnan cu kier cera boca di e prensa.”