WHO: Hantavirus no ta Covid y riesgo di pandemia mundial ta abou

WASHINGTON - World Health Organization (OMS) a declara cu hantavirus no ta mescos cu coronavirus y cu, pa awor, no tin señal cu e virus lo propaga riba escala mundial. Durante un conferencia di prensa, director general Tedros Adhanom Ghebreyesus y varios experto a explica cu e forma di contagio di hantavirus ta hopi diferente y cu transmision entre hende ta muy limita.

Segun expertonan di OMS, e mayoria di contagionan entre hende ta pasa solamente entre contacto hopi cerca, manera pareja, familiar of personal medico. Nan ta kere cu esey tabata e caso riba crucero hulandes MV Hondius, unda varios caso a wordo detecta.

Hasta awor tin ocho caso relaciona cu e outbreak: cinco confirma y tres persona morto. OMS a confirma cu no tin mas pasahero of tripulante cu sintomanan actualmente, algo cu nan ta considera bon noticia. Tambe, dos paciente hospitalisa na Hulanda ta estable, mientras un paciente den Sudafrica ta mustra mehoracion.

Expertonan a bisa cu e situacion riba e barco tabata particular debi na e espacio sera y contacto prolonga entre hende. Nan a compara esaki cu un outbreak anterior den Argentina entre 2018 y 2019, unda solamente 34 caso a wordo registra.

OMS a bisa cu, si medida sanitario manera aislamiento, rastreo di contacto y uso di equipo di proteccion ta sigui wordo aplica, e cadena di contagio por wordo kibra. Segun OMS, esaki no mester bira un pandemia mundial.

Durante e conferencia, Tedros Adhanom Ghebreyesus a enfatisa importancia di cooperacion internacional y inversion den seguridad sanitario, vacuna y prevencion, declarando cu virus no ta mira frontera ni politica.