Industria di aviacion ta teme caos na Merca prome cu mundial di futbol

NEW YORK  - Diferente compania di aviacion y organisacionnan di turismo na Merca ta adverti cu por surgi caos grandi den trafico aereo si gobierno mericano dicidi stop cu controlnan fronterizo na varios aeropuerto internacional.

Preocupacion a surge despues cu senador y minister di Seguridad Interno, Markwayne Mullin, a bisa cu gobierno por stop procesa pasahero y carga internacional na aeropuerto di Newark Liberty International Airport, un entrada importante pa New York City. Tambe a menciona posibilidad di suspende control na mas di 12 otro aeropuerto.

Sector di aviacion ta teme cu miles di turista y ciudadano mericano lo keda tranca, mientras buelo por wordo cancela of desvia. Tambe carganan importante porta lo no yega nan destino.

Organisacionnan manera Airlines for America, U.S. Travel Association y National Retail Federation ta alerta cu e situacion por afecta gravemente e imagen di Merca, specialmente cu 2026 FIFA World Cup ta acercando rapidamente.

Segun e organisacionnan, miyones di bishitante internacional por experimenta retraso y problema di biahe durante Mundial, algo cu por causa daño permanente na reputacion di Merca como destino turistico. Entretanto, varios ehecutivo di aviacion a indica cu nan no ta kere gobierno lo implementa e medida drasticonan inmediatamente.