ANALISIS: Chadwick Tromp no ta un “hungador cu ta faya”, pero un specialista cu MLB ta sigui busca

Scirbi pa Tito Laclé

Mi ta sigur cu mescos cu mi, hopi hende ta(bata) puntra nan mes, kico ta e ‘wega’ cu nan (Major League Baseball) ta haci na Merca cu e pelotero profesional arubiano Chadwick Tromp cu ta milita den Grandes Ligas. E la hunga pa varios ekipo caba, mescos cu otronan manera Xander Bogaerts. Y esaki ta un honor y orguyo pa nos na Aruba. E diferencia sinembargo, ta cu Bogaerts ta stabil. E no ta move di team, e no ta baha di e ‘roster’. A cambio, ora hende na Aruba lesa y mira di e carrera di Chadwick Tromp, hopi biaha e impresion ta cu algo no ta bayendo bon. Un dia e ta den Grandes Ligas, despues e ta wordo manda bek pa Triple-A, despues un otro ekipo ta firm’e, bah’e y poco tempo despues e ta subi atrobe. Pa hopi aficionado, esey ta parece un bida yen di incertidumbre, movimiento inconsistente y poco stabilidad.

Pakico e ta acepta esaki, bo lo pensa?. Un hende a compara su bida profesional manera un mal yoyo. Mi tambe. Bo lo bisa, si ta ami, mi lo a manda nan leu, y bisa nan ‘te aki’. Pero, mi a bay investiga mas leu, y manera mi por a sospecha, e cos ta mustra otro. 

KICO E SITUACION REAL TA?

Manera mi di, y por a spera, cos den realidad ta diferente pa loke ta e situacion ‘instabiel’ di Chadwick Tromp. Laga mi splica pakico  e situacion di Tromp ta mustra algo completamente diferente.

Den beisbol profesional, specialmente den Grandes Ligas, no tur hungador ta un streya (star). Tin hungadornan tambe cu ta ocupa un rol hopi importante, pero pateras d i escena. Chadwick Tromp a bira precisamente uno di e tipo di hungadornan ey.

E ROL DI E “TERCER CATCHER”

Den MLB, mayoria di ekiponan ta carga solamente dos catcher riba e roster activo di 26 hungador. Sinembargo, cada organizacion mester tin un tercer catcher disponibel den Triple-A, pa en caso di lesion, suspension of otro emergencia.

E catcher ey mester conoce e pitchernan, por maneha un wega, tin experencia na nivel halto y ta cla pa subi pa Grandes Ligas den cualkier momento. Tromp ta yena e perfil ey perfectamente.

E no necesariamente ta e catcher principal di un ekipo, pero e ta un catcher si, cu dirigentenan y entrenadornan ta confia aden. Y den beisbol profesional, confianza ta algo cu no por cumpra.

PAKIKO EKIPONAN TA SIGUI YAMA PE?

Cada biaha cu un catcher principal ta lesiona of cu un ekipo haya su mes cu falta di profundidad na e posicion, nomber di Tromp ta bolbe sali. Esaki a pasa na Atlanta, y awor tambe na Baltimore.

Ora un ekipo tin necesidad inmediato di un catcher cu ya tin experencia den Grandes Ligas, Tromp ta bira un opcion atractivo. Pero unabez cu catchernan titular recupera of prospectonan hoben ta cla pa subi, e ekipo mester haci espacio riba roster atrobe. Y ey ta unda e movemento constante ta cuminsa.

E NO TA UN RECHAZO PERSONAL

Pa e publico general, ser manda bek pa Triple-A of ser elimina di e roster por parece un rechazo. Pero den MLB, hopi biaha e decisionnan aki no tin nada di haber cu e calidad di e hungador.

E realidad ta cu cada puesto riba un roster di Grandes Ligas tin un balor enorme. Ekiponan constantemente ta busca ekilibrio entre hungadornan veterano y prospectonan hoben cu tin potencial pa futuro.

Si un ekipo tin cu scohe entre un catcher veterano di 31 aña y un prospecto di 22 aña cu por bira un streya den futuro, mayoria di biaha e prospecto ta gana e bataya.

Esaki no kiermen cu e veterano no ta sirbi. Al contrario, e ta simplemente un refleho di con MLB ta maneha su recurso humano.

E BIDA CU HOPI HENDE NO TA MIRA

Tin un otro banda di e historia cu hopi aficionado no ta considera.

Aunke un hungador ta move constantemente entre Triple-A y Grandes Ligas, e por gana un salario cu ta supera esun di hopi atleta profesional den mundo.

Cada dia cu un hungador pasa riba un roster di Grandes Ligas, e ta conta pa e salario, pension, beneficio medico y oportunidadnan profesional pa despues di su carrera activo.

Pa hopi catcher, e experiencianan aki eventualmente habri porta pa bira entrenador, scout, coordinador of hasta manager.

E CUMPLIDO CU HOPI HENDE NO TA MIRA

Talbes e aspecto mas interesante di e historia di Chadwick Tromp ta cu, si realmente e no tabata tin balor pa organizacionnan di Grandes Ligas, ekiponan lo a stop di yama pe hopi tempo caba. Pero esey no ta pasando! Atlanta a yam’e, Baltimore a yam’e, y awor Baltimore a bolbe yam’e .

Y durante su carrera, diferente organizacionnan a sigui mustra interes den su servicio.

Esaki ta indica cu e industria di beisbol profesional ta mira den Tromp algo cu hopi aficionado no ta mira inmediatamente: confiabilidad.

CONCLUSION

Mientras hopi persona ta mira e constante subida y bahada di Chadwick Tromp como un señal di instabilidad, realidad ta cu e por ta precisamente e contrario.

Tromp no ta un hungador cu ta lucha pa sobrebibi den e sistema. E ta un hungador cu e sistema mester.

E ta ocupa un di e rolnan mas dificil den beisbol profesional: ser e catcher veterano cu semper ta cla pa drenta den accion, sin importa unda of ora e oportunidad ta presenta.

No ta un bida glamoroso. No ta un bida cu hopi seguridad.

Pero cada biaha cu un equipo di Grandes Ligas ta yama su nomber, esaki ta confirma cu, na 31 aña di edad, Chadwick Tromp ta sigui ta un profesional cu organizacionnan di MLB confia den dje.

Y den mundo di beisbol profesional, talbez no tin un compliment mas grandi cu esey. C’est la Vie.