OM kier fondo special pa yuda victimanan di crimen cu no por recupera nan daño

ORANJESTAD – Victimanan di crimen violento na Aruba por haya mas apoyo den futuro cercano si un propuesta di Ministerio Publico (OM) bira realidad. Den su Jaarverslag 2025, OM a revela cu ta favorece e creacion di un fondo especial cu por brinda compensacion financiero na victimanan cu no por recupera nan daño directamente for di e persona culpable.

ESFUERSO AMPLIO

E iniciativa ta forma parti di un esfuezo mas amplio pa fortalece posicion di victimanan den sistema di husticia criminal. Segun OM, hopi biaha personanan cu a bira victima di crimen, ta enfrenta no solamente trauma emocional, sino tambe daño financiero considerable. Den diferente caso, aunke un huez ordena e culpable pa paga compensacion, e victima nunca ta ricibi e placa pasobra e delincuente no tin recurso financiero suficiente.

SCHADEFONDS 

Pa e motibo ey, durante 2025 un investigacion amplio a wordo conduci door di un stagiaire di Universidad di Aruba. E estudio a examina e posibilidad di crea un sistema compara cu e Schadefonds Geweldsmisdrijven cu ta existe den Hulanda. E conclusion principal di e investigacion tabata cu un fondo asina ta factibel pa Aruba y por contribui significativamente na bienestar di victimanan. Segun e informe, e fondo no lo elimina e responsabilidad di e delincuente. E persona culpable lo continua siendo responsable pa paga e daño causa. Sinembargo, e fondo por interveni den caso cu recuperacion di e daño no ta posible of no ta realistico.

CONFIANSA DI E CIUDADANO 

OM ta considera cu un mecanismo asina por aumenta confianza di ciudadano den sistema hudicial. Victimanan frecuentemente ta sinti cu e enfoke principal di e proceso criminal ta riba castiga e delincuente, mientras cu nan propio perdida y sufrimento no semper ta haya suficiente atencion. Cu e fondo, gobierno por manda un mensaje cla cu e bienestar di victimanan tambe ta un prioridad.

RECOMENDACION NA GOBIERNO 

Durante 2025, Ministerio Publico a presenta su recomendacion oficialmente na gobierno pa considera e establecimiento di un fondo nacional di compensacion pa victimanan di crimen violento. E propuesta ainda no a wordo converti den legislacion, pero segun OM e ta representa un paso importante den modernisacion di proteccion di victimanan na Aruba. Experencianan na Hulanda y otro paisnan europeo ta demonstra cu sistema nan similar por brinda apoyo rapido y efectivo na famianan y personanan afecta door di asesinato, tentativa di asesinato, agresion grave y otro crimen violento. Segun OM, e discusion tocante e fondo lo continua den e añanan binidero, mientras cu autoridadnan ta evalua e implicacionnan legal, financiero y administrativo di un sistema asina pa Aruba.

Fuente: Jaarverslag 2025 Openbaar Ministerie Aruba.