Escandalo cu oficial di Homeland Security di Merca a sali na cla despues di biahe luhoso pa Aruba

WASHINGTON – Un oficial halto di anti-terrorismo di Department of Homeland Security ta enfrenta investigacion despues cu su ex-novio a acus’e di us’e como “sugar daddy” y gasta decenas di miles di dollar pa mantene un estilo di bida luhoso.

E caso ta involucra Julia Varvaro, un funcionaria joven cu, segun acusacionnan, a ricibi te cu $40.000 durante un relacion corto, incluyendo biahenan internacional – entre nan un biahe na Aruba. Durante e estadia riba e isla, e ex-novio ta afirma cu Varvaro no tabata satisfecho cu e hotel na beach y a insisti pa cambia pa un hotel mas luhoso, aumentando e gastonan significativamente.

Segun e keho, e relacion a inclui gasto grandi pa vacacionnan, regalo caro y peticion regular pa apoyo financiero. E ex-novio a presenta un keho oficial, argumentando cu e conducta por representa un riesgo pa seguridad nacional, mientras cu Varvaro ta rechasa tur acusacion y ta bisa cu ta trata di un ex-novio frustra.

E caso ainda ta bou investigacion, pero a hala atencion pa e mezcla entre bida personal, poder oficial y posible implicacionnan pa seguridad. Aruba, den e historia aki, ta sali como uno di e destino luhoso unda e gasto excesivo a bira parte di e controversia.