Xi ta ricibi Trump na China, pero ta manda advertencia fuerte tocante Taiwan

PEKING – Presidente di China, Xi Jinping, a ricibi presidente americano Donald Trump cu hopi cordialidad durante su bishita oficial na Peking, pero a manda un mensaje cla tocante Taiwan.

Durante reunionnan den Gran Sala di Pueblo, Xi y Trump a papia pa mas di dos ora tocante relacion bilateral, comercio, seguridad y tensionnan geopolitico. Trump a yama Xi “un lider extraordinario” y a bisa cu relacion entre ambos pais por bira mihor cu nunca, mientras cu Xi a enfatisa cu China y Merca mester ta partner y no rival.

Sinembargo, tema mas delicado durante e bishita tabata Taiwan. China ta considera e isla democratico como parti di su territorio y Xi a advirti cu maneho incorrecto di asunto Taiwan por pone relacion entre ambos paisnan “den gran peligro”.

Gobierno di Trump recientemente a aproba un gran pakete di armamento pa Taiwan, algo cu China kier mira reduci of retrasa. Apesar di e reunion cordial, observadornan ta bisa cu no tin gran  acuerdo concreto ainda, y cu e encuentro ta mas un prome paso den un proseso diplomatico mas largo.

Temanan economico, competencia tecnologico y conflicto rond di Iran tambe a forma parti di e conversacionnan, mientras cu China y Merca ta sigui den un relacion complejo: dependiente economicamente, pero cada vez mas rival den comercio, seguridad y tecnologia