Iran y Merca ta acusa otro di kibra paro di fuego

WASHINGTON - Iran y Merca ta acusa otro di a kibra e paro di fuego, pero segun presidente Donald Trump, e acuerdo ainda ta na vigor. Ayera anochi y mainta tempran, tabatin varios atakenan den y rond di e Estrecho di Hormuz, mientras cu Emiratonan Arabe Uni tambe a reporta alarma di aire y atakenan cu misil y drone.

Segun Merca, Iran a cuminsa tira sin motibo riba tres barco militar americano cu tabata saliendo for di Golfo Persico rumbo pa Golfo di Oman. Iran, pa su banda, ta bisa cu Merca prome a ataka dos barco irani, incluyendo un tanker di petroleo. Iran tambe a publica imagennan cu segun nan ta mustra e atake cu misil riba e barconan americano.

Den Emiratonan Arabe Uni, defensa aereo a logra intercepta varios proyectilnan, y hasta awor no tin reportahe di dano ni victima. Autoridadnan a adverti ciudadanonan pa no acerca cerca di resto di misil of drone cu a cai.

Trump a declara cu, apesar di e confrontacion, e paro di fuego entre Merca y Iran ainda ta na vigor. El a minimisa e incidente, yamando e reaccion militar americano “solamente un tiki caricia.” Segun dje, e barconan militar americano no a sufri dano, mientras cu varios barco chikito iraniano a wordo destrui durante e operacion.

Despues di e incidente, Merca a lansa atakenan di “auto-defensa” riba varios blanco militar den Iran. Explosionnan a wordo reporta den Teheran, den ciudadnan di haf y riba isla iraniano Qeshm den Estrecho di Hormuz. Iran ta afirma cu tambe tin blanco civil cu a wordo toca, pero ainda no tin informacion cla tocante dano of muerto.