IATA ta pronostica cancelacion di buelonan den Europa na mei pa motibo di escasez di kerosin

BRUSELAS - Europa por enfrenta cancelacion di buelonan pa final di mei pa motibo di escasez di combustible pa avion. Esaki ta segun pronostico di Willie Walsh, hefe di organisacion internacional di aviacion IATA. Tambe e organisacion di aviacion aleman BDL a adverti diabierna cu posiblemente lo tin reduccion di oferta di buelonan pronto.

Pa motibo di blokeo di e estrecho di Hormuz, menos kerosin ta drenta mercado ultimamente. Esaki a causa escasez caba den Asia. Walsh a bisa cu den parti di ese continente caba a tin buelonan cancela pa falta di combustible pa avion. “Ademas di haci tur loke ta posible pa sigura liñanan alternativo di suministro, ta importante cu autoridadnan tin plannan cla y bon coordina lista pa caso cu racionamento bira necesario,” el a bisa den un declaracion.

E Agencia Internacional di Energia (IEA) a adverti diahuebs cu parti di Europa por enfrenta escasez di combustible pa avion den seis siman. Gran parti di e combustible cu Europa ta importa ta bini for di Medio Oriente. Segun BDL, si y ora situacion lo empeora ta depende hopi riba cuanto tempo conflicto cu Iran ta dura. Mesmo si guerra caba lihé, mercado di energia no lo recupera completamente mesora.

E hefe di linea aerea hungaro Wizz Air a bisa diabierna na e corant italiano Il Sole 24 Ore cu nan a haya escasez di combustible na tres aeropuerto den Italia. “Tur cos a wordo soluciona den un dia, y den algun caso den algun ora, sin cu nos mester a cancela buelonan,” el a declara. KLM y Transavia a confirma e siman aki cu nan ainda no tin escasez di kerosin.

BDL ta pidi gobierno aleman pa tuma medida di emergencia pa evita cancelacion di buelonan prome cu e temporada di zomer cuminsa. E organisacion ta propone, entre otro, acceso na sistema di pipeline di NAVO pa fortalece suministro di combustible na aeropuerto grandi manera Frankfurt y München, y un reduccion temporal di impuesto di CO2 pa compañianan di aviacion.