Funcionario di gobierno argentino envolvi den escandalo pa biahenan haci pa Aruba

BUENOS AIRES - Autoridadnan huridico na Argentina a confirma cu funcionario Manuel Adorni a viaha na Aruba hunto cu su casa y dos yiu, unda segun informacion oficial, tur pasashi a wordo paga cash pa un balor di 1.450 dolar cada un. E informacion aki ta forma parti di un investigacion mas amplio conduci pa fiscal Gerardo Pollicita.

CANTIDAD DI BIAHE 

Fiscalia tin registra di 17 viahe cu Adorni a haci desde 2022, y ta sigui amplia e investigacion pa determina destinonan final, fecha y costo di cada trayecto. Den e proceso, a pidi documentacion na diferente aerolineanan y a cita testigonan pa splica con a  paga e pasashinan.

ENTRADA OFICIAL 

Investigacion ta centra riba si e gastonan di viahe ta cuadra cu e entrada oficial cu funcionario a declara. Pa esaki, autoridadnan tambe ta revisa su movimientonan financiero, propiedadnan y otro gasto relaciona cu su estilo di bida.

DESBALANSE

E caso a cuminza despues di sospechanan di un posible desbalans entre entrada y gasto, incluyendo otro viahenan, algun di nan paga pa gobierno y otro cu aparentemente a wordo cubri cu fondo propio. Fiscalia ta sigui reuni informacion pa clarifica con e viahenan a wordo financia y si tur cos ta dentro di ley.