Detencion na Aruba a bira parti clave den investigacion internacional contra doño di Plus Ultra

MADRID/ORANJESTAD – Un investigacion internacional grandi tocante labamento di placa, organizacion criminal y trafico di influencia a pone Aruba den centro di atencion despues cu un sospechoso importante den e caso, Luis Felipe Baca Arbulu, a wordo detene na Aruba.

E caso ta relaciona cu Plus Ultra Líneas Aéreas y su principal accionista, Rodolfo Reyes, contra kende un huez na Spaña awor a emiti orden internacional di detencion pa delito nan manera labamento di placa, apropiacion indebido, trafico di influencia y participacion den organizacion criminal.

Segun investigacion di Audiencia Nacional na España, Reyes y otro directivonan di Plus Ultra presuntamente a usa placa cu gobierno spaño a entrega como apoyo financiero durante pandemia pa move placa via diferente compania y cuenta bancario den varios paisnan.

Autoridadnan spaño  ta sospecha cu parti di e fondo nan a wordo transferi na cuenta bancario opaco den lugarnan manera Gibraltar, Suiza, Montenegro y Isla Mauricio. Tambe tin sospecho di operacionnan relaciona cu benta di oro di origen desconocido.

Aruba a drenta den e investigacion despues cu Luis Felipe Baca Arbulu, identifica como un di e persona nan cu tabata maneha e presunto red di labamento di placa, a wordo deteni riba isla. Segun informacion comparti na Spaña, defensa di Baca Arbulu ya a indica cu el no lo opone contra posible extradicion.

Na mes momento, huez spaño  tambe a emiti ordennan internacional di detencion contra otro sospechosonan, incluyendo empresario Rodolfo Reyes y su casa, María Aurora López.

E caso a crea hopi conmocion den Spaña paso Plus Ultra Líneas Aéreas a ricibi anteriormente un apoyo financiero di 53 miyon euro for di estado spaño , algo cu awor ta wordo examina den profundidad pa determina si e fondo nan a wordo usa ilegalmente.