Reino Uni ta prohibi tabaco pa generacion nobo

REINO UNI – Muchanan y hobennan bou di 18 aña den Reino Uni lo nunca por cumpra cigaria legalmente den nan bida. Un ley pa esaki a wordo aproba pa Parlamento Britanico, tanto den e Camara Bajo como e Camara Alto. Gobierno britanico ta spera cu e medida aki lo crea un generacion sin tabaco. Segun e ley, negocio nan no por bende producto di tabaco, manera cigaria of vape, na persona cu a nace despues di 31 di december 2008. Esaki ta significa cu tur hende nace despues di e fecha aki nunca lo por cumpra tabaco legalmente. E ley ainda mester haya aprobacion oficial di e rey, cu ta spera pa sosode siman cu ta bini.

SALBA BIDA

Despues di aprobacion, minister nan lo haya mas poder pa pone reglanan mas stricto, por ehempel riba sabor nan di vape y empake di pakete di cigaria. Ademas, uso di vape lo wordo limita mas. E-sigareta lo keda prohibi den auto cu muchanan, riba plaza di wega y cerca di scol nan. Minister di Salud, Streeting, a bisa cu e ley nobo lo tin impacto positivo grandi. “E reforma aki lo sabla bida, baha presion riba sistema di salud y crea un Reino Uni mas saludabel.” Segun The Guardian, cada aña tin cerca 400.000 hospitalisacion como resultado di humamento. Esaki ta costa sistema di salud britanico, NHS, casi 3,5 milyar euro pa tratamento di enfermedad manera cancer y problema di curason.

PROCESO LARGO

E ley aki ta resultado di aña di discusion. E propuesta a bin di ex-primer ministro Rishi Sunak aproximadamente dos aña pasa. Desde e tempo ey, a tin varios ronda di votacion y ahustenan te cu finalmente a wordo aproba.