ORANJESTAD - Gerencia di Aruba Ports Authority (APA) cu hopi orguyo ta anuncia cu tres barco crucero grandi cu a dorna waf di Oranjestad diahuebs, a percura pa trece un cifra record di bishitantenan pa Aruba. Mas cu 11 mil biahero, combina cu mas di 4 mil tripulante di e barconan, a trece un bista alegre den centro di ciudad, su alrededor y rond Aruba pa esnan cu a haci uzo di e diferente tournan.

ORANJESTAD – Fondo Monetario Internacional (IMF) ta haci un investigacion di e gastonan di personal di Gobierno. Asina gobierno di Aruba a informa diabierna den un comunicado.  Esaki ta nifica cu  IMF ta asisti Aruba cu un investigacion di e gastonan relata na personal conoci como 'wage bill.' Esaki mirando cu gobierno segun su informacion, ta purbando di baha gastonan di personal, pa asina cumpli cu e peticion di e colegio di supervision financiero CAFt y asina evita un posibel ‘instruccion’. CAFt a recomenda un instruccion cu lo keda trata dia 22 di e luna aki den Rijksministerraad. Gobierno cu e intento aki, kier mustra cu nan ta haciendo tur cos pa logra e meta di e reduccion. 

ORANJESTAD - Banco Central di Aruba (BCA) ta anuncia cu durante di e periodo di 8 te cu 29 di november 2019, BCA lo tene bao di nos comunidad e secundo “Encuesta di Corupcion”. E meta ta adkiri informacion valioso tocante e experiencia y percepcion di nos ciudadanonan pa cu e nivel di corupcion. Door cu Aruba no ta forma parti di e encuestanan internacional riba e topico di corupcion, BCA a dicidi di tene e “Encuesta di Corupcion” pa prome biaha na 2018. E encuesta aki ta pa un gran parti basa riba e metodologia y preguntanan aplica door di ‘Transparency International’ y tambe tin algun pregunta relata na Aruba su propio situacion.  E encuesta ta inclui, entre otro, preguntanan relata na e nivel di corupcion, experiencia cu corupcion na momento di haci uzo di entre otro servicionan particularmente den e sector publico, experiencia ora di raporta corupcion, y e necesidad pa medidanan adicional pa combati corupcion. 

ORANJESTAD – E mega crucero MSC Meraviglia a drenta waf di Aruba awe mainta. Loke ta haci’e algo peculiar, ta cu e ta e bapor crucero di mas peso, cu a yega di drenta e waf di Oranjestad. Como tal ta considera esaki como algo historico pa turismo crucero di Aruba segun minister cu ta responsabel pa e cartera aki, Dangui ODuber. E bapor tin un largura di 315 meter y ta carga 4.500 pasahero y mas di 1500 tripulante.  

ORANJESTAD – Durante un reunion cu a dura hopi cortico segun sindicatonan bringando pa indexering, nan a entrega un proposicion nobo na gobierno y a duna gobierno un siman pa reacciona positivamente riba dje. Den e proposicion nobo, sindicatonan a baha nan punto di salida inicial di 3.6% te na 2.4%, cu ta ekivalente na 101 florin extra pa luna. E 1.2% cu falta, gobierno por paga den forma alternativa, y esaki por wordo dicidi den e commission cu sindicatonan kier pa gobierno instala rapidamente. 

ORANJESTAD – E grupo di sindicato SEPPA, SPA, SIMAR, SADA y TOPA cu ta purbando pa haya pago di indexering for di gobierno, lo topa gobierno pa di dos biaha diamars mainta pa ricibi un di ‘dos’ propuesta di parti di gobierno. Esaki despues cu e prome proposicion di gobierno a keda unanimamente rechasa pa e sindicatonan en cuestion. E pensamento di sindicatonan ta pa awe diamars mainta haya un proposicion cu ta realistico, sino sindicatonan ta determina pa tuma accion den nomber di nan miembronan.