Riesgo di gambling ta mas halto entre hungadonan cu entrada abou na Aruba

ORANJESTAD — Personanan cu un entrada financiero limita ta aparece entre e grupunan mas vulnerabel pa comportacion riesgoso relaciona cu gambling na Aruba. Un investigacion cientifico ta revela cu 43% di e hungadonan cu un entrada netto mensual di te cu Afl. 1.000 ta mustra caracteristicanan di riesgo modera of halto. E cifra ta contrasta cu 18% entre hungadonan cu un entrada di Afl. 3.001 of mas pa luna. E diferencianan aki ta un di e hallazgonan mas significativo den e estudio Onderzoek Kansspeldeelname Aruba, realisa pa RE-Quest Research & Consultancy.

UN DI CUATER HUNGADO CU RIESGO ELEVA

E investigacion a aplica un metodo internacional di evaluacion, conoci como Problem Gambling Severity Index (PGSI), pa identifica caracteristicanan di comportacion riesgoso. Di e respondentenan cu a hunga durante e ultimo aña y cu tin resultado valido di e evaluacion, 20% a wordo clasifica den categoria di riesgo modera y 5% den categoria di riesgo halto. Esaki ta representa aproximadamente un di cada cuater hungado den e grupo evalua. Otro 16% ta den categoria di riesgo abou, mientras cu 59% no ta mustra caracteristicanan di comportamiento problematico segun e instrumento uza. E investigadornan ta aclara cu e resultadonan no ta diagnostico di adiccion, sino señalnan di riesgo.

HOMBERNAN, HOBENNAN Y ADULTO MAYOR

E estudio ta identifica otro diferencia importante. Hungadonan homber ta aparece mas frecuentemente den e categorianan di riesgo modera of halto cu hungadonan muher. Segun edad, e proporcionnan mas halto ta aparece entre hungadonan di 18 te 39 aña y entre esnan di 65 aña of mas. E dato aki ta indica cu tanto cierto grupunan di hoben adulto como adulto mayor merece atencion special den programanan di prevencion.

ENTRADA LIMITA Y RIESGO FINANCIERO

E diferencia entre hungadonan cu entrada abou y esnan cu entrada mas halto ta especialmente relevante pa Aruba. E estudio ta mustra un relacion entre nivel di entrada y caracteristicanan di riesgo, pero no ta establece cu falta di placa directamente ta causa adiccion na gambling. Tampoco ta nifica cu tur persona cu entrada abou cu ta hunga wega di placa tin problema. E investigadornan ta adverti cu un parti considerable di e hungadonan no a reporta informacion valido tocante nan entrada, y pa e motibo ey e resultado mester wordo interpreta cu cautela Sinembargo, e patronchi identifica ta un señal importante pa Gobierno considera den desaroyo di maneho di gambling, especialmente pa protege famianan financieramente vulnerabel. E rapport ta recomenda prevencion dirigi na grupunan specifico y mas atencion na educacion financiero. Click AKI pa e rapport completo.