ORANJESTAD — Apesar cu economia di Aruba a crece cu 3,5% durante e prome seis luna di 2026, 89,7% di consumidor encuesta ta sinti cu nan poder di compra a baha. Esaki ta surgi for di e informe State of the Economy – First Half of 2026 di Banco Central di Aruba (CBA).
E indice di confiansa di consumidor a baha di 95,0 punto den segundo kwartaal di 2025 pa 93,6 punto den e mesun periodo di 2026. Ademas, 93% di e encuestadonan ta spera cu prijsnan lo sigui subi den e proximo seis luna.
Inflacion anual a alcanza 2,4% na juni, mientras prijsnan di alimentacion a aumenta cu 3,5% y energia cu 6,5%.
E incertidumbre economico tambe ta afecta decisionnan financiero. Solamente 10% di consumidor ta considera e momento favorable pa saca un hipoteca, mientras 14,3% ta mira e momento adecuado pa cumpra un auto.
E cifranan ta mustra un contraste entre crecemento economico nacional y realidad financiero di consumidor, cu ta sigui enfrenta presion di costo di bida.