148 persona malo na bordo di crucero cu a bishita Aruba

148 persona malo na bordo di crucero cu a bishita Aruba

Posted on 11/20/2026, 1:18 PM AST | Updated on 11/20/2026, 1:18 PM AST

ORANJESTAD — Un total di 148 pasahero y tripulante di e crucero Caribbean Princess, cu a bishita Aruba diasabra 14 november, a raporta sintomanan di un malesa gastrointestinal cu su causa ainda no ta conoci. Esaki segun un informe di Centers for Disease Control and Prevention (CDC) di Merca.

E barco di Princess Cruises a sali for di Fort Lauderdale dia 11 november pa un crucero di 12 anochi, cu parada na Aruba, Colombia, Panama, Costa Rica y Islanan Cayman. E barco a yega Aruba dia 14 november, mientras e caso di malesa a wordo reporta oficialmente na CDC dia 15 november.

Segun e cifranan di CDC te cu 17 november, 134 di e 2.936 pasaheronan y 14 di e 1.132 tripulantenan a reporta sintomanan, principalmente sacamento y diarrea.

Ainda no ta conoci kico a causa e malesa. CDC ta indica cu norovirus frecuentemente ta responsabel pa e tipo di brotenan aki riba crucero, pero den e caso aki no tin confirmacion.

Princess Cruises a informa cu e tripulacion a implementa medidanan adicional di limpieza y desinfectacion, mientras personanan malo a wordo isola. Tambe a colecta muestra pa investigacion.

E cifranan ta representa tur caso reporta durante e biahe, no necesariamente personanan cu tabata malo na e mesun momento.

Pa Aruba, e hecho cu e barco a bishita nos isla ta relevante, pero te awor no tin informacion cu ta confirma cu e malesa a origina na Aruba, ni cu e brote a afecta personanan riba nos isla.

CDC ta sigui monitorea e situacion mientras resultado di e investigacion ta pendiente.