Gobierno cu surplus di Afl. 238 miyon, pero poder di compra ta baha

Gobierno cu surplus di Afl. 238 miyon, pero poder di compra ta baha

Posted on 11/20/2026, 1:20 PM AST | Updated on 11/20/2026, 1:35 PM AST

ORANJESTAD — Gobierno di Aruba a registra un surplus financiero di Afl. 238,1 miyon durante e prome seis luna di 2026, un aumento di Afl. 34,7 miyon compara cu e mesun periodo di 2025. Segun Banco Central di Aruba (CBA), entrada total di Gobierno a crece cu 10,3%, mientras gastonan publico a aumenta cu 8,6%.

E aumento di entrada ta relaciona principalmente cu recaudacion di belasting, cu a genera Afl. 77,9 miyon adicional. Belasting riba entrada y ganashi a subi cu 10,8%, BBO/BAVP cu 8,2% y belasting relaciona cu servicio, incluyendo turismo, cu 15,7%.

Na mes momento, gastonan riba productonan y servicio a aumenta cu 20,9%, mientras transferencia y subsidio a crece cu 18,9%.

Debe publico di Aruba tabata Afl. 5.082,2 miyon na juni 2026, equivalente na 62,9% di producto interno bruto, un reduccion significativo compara cu 124,9% registra na 2021.

Sinembargo, e resultado financiero positivo ta contrasta cu situacion di consumidor. Segun Banco Central, 89,7% di e personanan encuesta ta sinti cu nan poder di compra a baha.

E cifranan ta lanta e pregunta con e mehoramento di finansa publico por traduci den alivio economico pa famianan, particularmente den e debate actual tocante costo di bida y salario minimo.