ORANJESTAD — E Mediathon E Brasa, organisa dia 14 november 2026 pa Cas di Cultura, a recauda Afl. 310.000 den donacionnan confirma y promesanan di contribucion pendiente pa e proyecto di renobacion di Aruba su Teatro Nacional.
Durante e evento di 12 ora, cu a carga e tema Un Dia, Un Meta, artistanan, organisacionnan cultural, negoshinan y comunidad a uni forsa cu presentacionnan bibo y actividadnan pa recauda fondo.
Un di e anuncionan special tabata e decision pa nombra e foyer di Cas di Cultura na honor di Maybeline Arends-Croes, musico, director di coro y docente cu a contribui significativamente na desarrollo musical y cultural di Aruba.
E fondo recauda lo contribui na restauracion y modernisacion di e teatro. Cas di Cultura a gradici tur donante, sponsor, artista y boluntario pa nan sosten.
E organisacion ta recorda personanan cu ainda tin promesanan pendiente pa completa nan contribucion via e cuenta di proyecto E Brasa. Pa mas informacion por yama 582-1010 of manda email na info@casdicultura.aw.