Miguel Mansur ta alerta pa costo di aumento di salario minimo

ORANJESTAD — Ex-politico Miguel Mansur ta cuestiona con gobierno ta pensa di financia e aumento di salario minimo sin pone mas presion riba empresanan, consumidornan y finansas publico.

Segun Mansur, 20.526 trahado den sector priva ta gana menos cu e minimo necesario pa subsisti di Afl. 2.683 pa luna. Sinembargo, e ta señala cu e cifranan no ta inclui entrada di tips, specialmente den sector hotelero y horeca.

Mansur ta calcula cu un aumento promedio di Afl. 400 pa luna lo costa sector priva aproximadamente Afl. 123,2 miyon anual, incluyendo gastonan adicional di dunadonan di trabao. E ta argumenta cu reduccion di belasting riba ganashi no lo ta suficiente pa compensa empresanan.

Ademas, e ta alerta cu compromisonan financiero nobo di gobierno por aumenta presion riba presupuesto. Cu casi Afl. 2 biyon di entrada anual, Mansur ta exigi reforma, reduccion di gasto y un plan financiero sostenibel.

Segun e ex-politico, trahadonan merece miho salario, pero sin un plan solido, empresanan y consumidornan por caba ta pagando e prijs.