Estudio: 64% di esnan encuesta na Aruba ta participa den gambling: loteria ta domina

ORANJESTAD — Un investigacion cientifico nobo ta revela con profundamente weganan di placa ta forma parti di bida diario na Aruba. Segun e estudio Onderzoek Kansspeldeelname Aruba, 64% di e personanan adulto encuesta a participa den por lo menos un tipo di wega di placa durante e ultimo 12 lunanan. E investigacion a wordo realisa pa RE-Quest Research & Consultancy entre 720 residente adulto di Aruba, riba encargo di Ministerio Hulandes di Asuntonan Interno y Relacionnan den Reino (BZK), den cooperacion cu Kansspelautoriteit Aruba cu ta den proceso di formacion.

LOTERIA TA E MAS POPULAR

E resultadonan ta mustra cu loteria ta domina mercado di gambling local. Di tur respondente, 49% a participa den loteria durante e ultimo aña, compara cu 15% den weganan di casino y 13% den rifa y sorteo. E investigadornan ta indica cu un di e motibonan pa e popularidad di loteria ta su accesibilidad. Punto di benta ta situa den tienda y otro luganan cu residentenan ta bishita regularmente. Mientrastanto, casino ta concentra principalmente den zonanan turistico, pero tin establecimentonan cu tambe ta atrae hungadonan local.

GANA PLACA TA E MOTIBO PRINCIPAL

E estudio ta mustra cu 64% di e hungadonan ta menciona gana placa como e motibo principal pa participa. Otro motibonan ta diberticion (24%), pasa tempo (15%), contacto social (10%) y reduci stress (10%). Mayoria di e hungadonan ta participa di manera relativamente limita. Segun e estudio, 55% ta gasta menos cu Afl. 20 pa siman, mientras cu 18% ta gasta mas cu Afl. 50. Sinembargo, 31% di e hungadonan ta participa tur siman y 4% diariamente.

UN ACTIVIDAD CU TA FORMA PARTI DI COMUNIDAD

E investigacion ta confirma cu gambling no ta limita na casino. E ta presente den bida social, familiar y economico di comunidad. Un 55% di respondentenan ta conoce un pareja, familiar of bon amigo cu a participa den weganan di placa durante e ultimo aña.

E resultado ta pone un pregunta importante riba mesa pa autoridadnan: con regula un actividad cu ta asina integra den bida diario di Aruba, sin desconoce su funcion recreativo y social? E investigadornan ta recomenda cu futuro supervision no enfoca solamente riba casino, sino tambe riba loteria y otro tiponan di wega di placa. E estudio ta mustra un participacion amplio, pero esaki no kiermen cu tur hungado tin problema di adiccion. Click AKI pa e rapport completo