Seis gremio empresarial ta pidi Gobierno pa no subi salario minimo sin estudio economico profundo

ORANJESTAD — Seis organisacion empresarial na Aruba ( CUA, ATIA, AHATA, AFBA, ATSA, y WAB) a dirigi un carta na Minister di Finansa y Asunto Economico Geoffrey Wever, den cual nan ta urgi Gobierno pa no tuma un decision tocante aumento di salario minimo te na nivel di subsistencia (bestaansminimum) sin prome realiza estudionan independiente riba e consecuencianan economico y social. E carta, fecha 29 october 2026, ta sigui un reunion cu minister Wever riba 14 october, durante cual Gobierno a pidi e gremionan pa presenta un propuesta di compensacion fiscal pa mitiga e impacto di un aumento salarial.

AUMENTO SIN ESTUDIO TA IRRESPONSABEL

E organisacionnan ta reconoce e necesidad di mehora poder di compra di residentenan cu entrada abou, pero ta considera irresponsabel pa introduci un aumento drastico di salario minimo sin investigacion suficiente. Segun e gremionan, e rapport Koopkrachtplan Aruba di EBA ta presenta principalmente un inventario di posible medidanan, sin analisis completo di nan consecuencianan. Nan ta critica tambe e posibilidad cu Gobierno por aumenta entrada di un banda mediante alivio fiscal, pero causa subida di prijs di otro banda.

DIES ESTUDIO ANTES DI TUMA DECISION

Den nan carta, e seis organisacionnan ta solicita diez tipo di investigacion, incluyendo cantidad di persona cu ta gana menos cu e nivel di subsistencia, impacto riba structura salarial di empresanan, riesgo di inflacion, efecto riba empleo y posible crecemento di sector informal. Nan ta pidi tambe un analisis di Fondo Monetario Internacional (IMF) tocante e impacto specifico pa Aruba, investigacion di alternativanan pa mehora poder di compra y evaluacion di compensacion fiscal pa empresanan cu lo enfrenta gastonan salarial mas halto. Otro punto ta cuanto entrada adicional Gobierno mes por ricibi como consecuencia di un salario minimo mas halto.

CRITICA RIBA DECISIONNAN POLITICO

E gremionan ta adverti Gobierno pa no basa su decision riba emocion of popularidad politico a corto plaso, sin compronde e efecto real riba comunidad. Nan ta propone cu Gobierno y sector empresarial acorda hunto cua instancia independiente lo realiza e estudionan, pa garantiza imparcialidad y dato verificabel. E carta ta conclui cu cualkier medida pa mehora poder di compra mester ta sostenibel y tene cuenta cu su impacto riba empleo, empresanan y economia di Aruba.

SEIS REPRESENTANTE A FIRMA E CARTA

E documento ta firma pa Frans Ponson di Comerciantenan Uni di Aruba (CUA), Danilo Werleman di Aruba Trade & Industry Association (ATIA), Tisa LaSorte di Aruba Hotel & Tourism Association (AHATA), Miriam Dabian di Aruba Financial & Business Association (AFBA), Sulaika Kelly di Aruba Timeshare Association (ATSA) y Fred Steegh di WAB. Cu e posicion conhunto aki, e seis organisacionnan ta pone presion riba Gobierno pa cu, prome cu un decision definitivo tocante salario minimo, haya claridad riba e costo real di e medida, su consecuencianan pa empresanan y su efecto final riba poder di compra di comunidad.