Minister Herdé: Ta busca balansa entre touroperators di ATV/UTV y proteccion di naturalesa

ORANJESTAD — Minister di Infrastructura, Rene Herdé, a reuni pa prome biaha cu tur stakeholders envolvi hunto den e debate tocante uzo di ATV y UTV na Aruba, cu e meta di busca un balansa entre actividadnan turistico y proteccion di naturalesa.

Na e reunion a participa representantenan di touroperators, Aruba Birdlife Conservation (ABC), Dienst Natuur en Milieu (DNM) y Aruba Conservation Foundation (ACF).

E encuentro a ofrece oportunidad pa intercambia opinion y explora posibilidadnan pa actividadnan economico y recreativo por co-existi cu conservacion di medio ambiente.

Segun minister Herdé, e dialogo a transcuri den un ambiente positivo y constructivo. E partidonan a reconoce importancia di busca un solucion cu ta tene cuenta cu interesnan tanto di sector turistico como di proteccion ambiental.

Herdé a anuncia cu e combersacionnan lo continua den proximo reunionnan, cu e intencion di yega na un entendimento comun prome cu tuma decisionnan definitivo.