FIFA ta inverti USD 5,3 miyon den shete veld di futbol artificial na Aruba

ORANJESTAD — Presidente di FIFA, Gianni Infantino, a participa diaranson 4 di november na ceremonia oficial pa cuminsa instalacion di e prome di shete veld di futbol cu yerba artificial na Aruba. E proyecto ta un colaboracion entre FIFA y Arubaanse Voetbal Bond (AVB), cu un inversion di USD 5,3 miyon for di programa FIFA Forward.

E proyecto, cu a tuma cuater aña di preparacion, ta busca mehora infrastructura futbolistico na Aruba, specialmente mirando cu e clima seco ta dificulta mantenimento di veldnan cu yerba natural.

Segun e plan, dos veld lo keda instala ainda e aña aki, mientras cu e otro cinco lo wordo completa na 2027. E inversion ta enfoca tambe riba clubnan mas chikito y promocion di participacion femenino den futbol.

Durante su bishita, Infantino a gradici directiva di AVB y Minister di Deporte Gerlien Croes pa nan sosten.

FIFA a destaca tambe e dos mini-veld inaugura na juni na Boegoeroei y Pos Chikito, mientras cu tres veld adicional ta den planificacion. Ademas, FIFA lo entrega 300 paar di sapato di futbol na Aruba.

E inversion ta complementa e programa di desaroyo di talento di AVB, cu na april 2025 a inaugura e prome FIFA Talent Academy den Caribe. “Hunto nos ta traha pa transforma soñonan den realidad y crea oportunidad pa mucha homber y mucha muhe riba henter e isla,” Infantino a declara.