Impact Hub Aruba ta firma dos acuerdo pa amplia oportunidadnan comercial y inversion den Caribe Hulandes

ORANJESTAD — Impact Hub Aruba a firma dos acuerdo di colaboracion (MoU) cu Curaçao Innovation Hub y Dutch Caribbean Innovation Fund, cu e meta di conecta emprendedornan y ecosistemanan di innovacion di Aruba, Caribe Hulandes y Hulanda.

E acuerdonan a wordo firma durante bishita di Minister di Economia di Hulanda, Heleen Herbert, den conexion cu inauguracion di Curaçao Innovation Hub.

E colaboracion cu Curaçao Innovation Hub ta enfoca riba intercambio di conocemento, acceso na rednan empresarial, organizacion di eventonan y creacion di oportunidadnan comercial pa startupnan y scaleupnan di ambos isla.

E segundo acuerdo, cu Dutch Caribbean Innovation Fund, ta contempla establecimento di Dutch Caribbean Innovation Alliance den e proximo 12 luna. E aliansa lo busca amplia acceso na mercado regional, partnernan strategico y inversionistanan.

Segun directora di Impact Hub Aruba, Mary-Ann Falconi-Rasmijn, cooperacion regional ta esencial pa negoshinan di economianan chikito. “Ora nos conecta nos ecosistemanan, nos ta crea mas oportunidad pa crecimiento, expansion y inversion,” Falconi-Rasmijn a declara.