TUI ta aumenta vuelo Amsterdam–Aruba di dos pa tres pa siman na 2027

ORANJESTAD — Compania aereo TUI fly lo amplia su conexionnan entre Hulanda y e islanan ABC entrante april 2027, cu un vuelo adicional pa Aruba cada siman. E cantidad di conexionnan cu Aruba lo subi di dos pa tres pa siman.

Segun e itinerario nobo confirma pa TUI, e vuelonan combina cu Aruba y Bonaire ta programa pa dialuna, diaranson y diabierna. E ampliacion ta forma parti di un plan pa aumenta conectividad entre Amsterdam y Caribe Hulandes.

Bonaire lo haya pa prome biaha un conexion diario cu Amsterdam den e itinerario di TUI, aumentando di cinco pa shete vuelo pa siman. Di esakinan, tres ta combina cu Aruba, dos cu Corsou y dos cu Punta Cana, Republica Dominicana.

Pa Corsou, TUI ta proyecta nuebe vuelo directo pa siman for di Amsterdam, ademas di dos conexion combina cu Bonaire.

Segun TUI, e ampliacion ta responde na demanda creciente pa biahe entre Hulanda y e islanan ABC. E secuencia exacto di e paradanan y orarionan di vuelo ainda por cambia prome cu e itinerario di zomer 2027 drenta na vigor.