Agunbero (Caft): Tin empresanan publico cu ta enfrenta problema financiero pa añanan largo

ORANJESTAD — Mientras cu algun empresa publico di Aruba tin reserva suficiente pa enfrenta contratiempo financiero, otro ta enfrenta problema structural cu ta existi pa aña largo. Esaki a sali dilanti durante un entrevista di Noticiacla cu Marion Agunbero, representante di Aruba den CAft.

CONSECUENCIA

Confronta cu e pregunta ken finalmente ta carga e consecuencia ora un empresa di Gobierno enfrenta problema financiero, Agunbero a splica cu e contesta ta depende di e entidad y su situacion particular. Segun e, tin empresanan cu tin suficiente reserva financiero pa absorba nan propio problema. Sinembargo, otro ta enfrenta dificultad financiero estructural cu ta exigi decisionnan tocante nan futuro.

LEGISLACION CORPORATIVO

Agunbero a enfatisa importancia di introduci e legislacion di corporate governance, cu mester fortalece e manera cu empresanan publico ta wordo administra y supervisa. E necesidad di supervision ta relaciona directamente cu posibilidad cu riesgo financiero di e empresanan aki eventualmente afecta Gobierno y, indirectamente, comunidad. CAft anteriormente a señala ehempelnan di problema den maneho di empresanan publico, incluyendo financiamiento desfavorabel y decisionnan cu no tabata suficientemente coordina. 

COLLEGES FINANCIEEL TOEZICHT

Aunke Agunbero no a identifica den e entrevista cua empresa actualmente ta enfrenta e problemanan structural, su declaracion ta confirma cu e asunto ta un preocupacion cu Gobierno mester sigui atende. E pregunta cu ta keda habri ta si Aruba tin suficiente transparencia pa e ciudadano conoce e berdadero situacion financiero di tur su empresanan publico.