Credito bancario y turismo ta crece, inflacion ta subi na Aruba

Credito bancario y turismo ta crece, inflacion ta subi na Aruba

Posted on 11/17/2026, 7:07 AM AST | Updated on 11/17/2026, 7:09 AM AST

ORANJESTAD — Credito bancario na Aruba a registra un aumento significativo durante september 2026, mientras turismo a sigui crece y inflacion a alcanza 3,0% compara cu e mesun luna di 2025. Esaki ta resalta den e relato mensual di Banco Central di Aruba (BCA).

Segun BCA, credito domestico a aumenta cu Afl. 142,6 miyon, principalmente debi na un expansion di Afl. 170,6 miyon den prestamonan bancario na sector priva. Di e aumento aki, Afl. 137,6 miyon tabata credito na empresanan, Afl. 17,1 miyon na hipoteca pa vivienda y Afl. 15,5 miyon na credito di consumidor.

Mientrastanto, e cantidad di placa den circulacion a baha cu Afl. 10,8 miyon, te na Afl. 7.633,7 miyon. Reserva netto di divisa tambe a registra un bahada di Afl. 147,5 miyon.

INFLACION Y ENTRADA DI GOBIERNO

Prijsnan di consumo a aumenta cu 3,0% compara cu september 2025, principalmente debi na gastonan di transporte. E promedio anual di inflacion a subi di 1,0% na augustus pa 1,3% na september.

Entrada total di Gobierno a suma Afl. 131,7 miyon, un reduccion di Afl. 34,6 miyon compara cu september 2025, principalmente debi na menos entrada no relaciona cu impuesto.

TURISMO TA SIGUI CRECE

Aruba a ricibi 114.517 turista durante september, un aumento di 17,1% compara cu e mesun luna di 2025. E crecemento mas fuerte a bin di Latinoamerica, cu 49,4%, sigui pa Europa cu 12,2% y Norteamerica cu 8,2%.

E cifranan ta mustra expansion den credito bancario y actividad turistico, mientras inflacion y e reduccion den entrada di Gobierno ta forma parti di e desaroyonan economico registra durante september.