DEN HAAG — Despues di varios dia di negociacion di crisis, e partidonan D66, VVD y CDA a logra restablece confianza entre nan y a dicidi di continua cu e gabinete minoritario. Sinembargo, Prome Minister Rob Jetten a anuncia cu Gobierno mester cambia su manera di traha cu Parlamento pa evita conflicto similar den futuro.
Segun Jetten, mester bin cu acuerdonan structural cu partidonan di oposicion pa garantiza suficiente sosten pa presupuesto y maneho di impuesto. E ta propone un modelo Scandinavo, den cual Gobierno ta negocia cu bloqnan di partido di izquierda of derecha, dependiendo di e asunto.
Vice-presidente di Raad van State, Sybrand Buma, a ricibi e encargo pa investiga con e sistema aki por funciona. E tin un luna pa presenta su recomendacionnan.
Como parti di e acuerdo pa restaura confianza, e coalicion a dicidi tambe di prepara un paquete di medidanan pa sostene empresanan chikito y mediano (MKB), especialmente den inversion, innovacion y sostenibilidad.
E crisis a cuminsa despues cu D66 y CDA a yega na un acuerdo cu partidonan di oposicion Pro y Volt pa aumenta impuesto riba patrimonio, sin participacion di VVD. E partido a critica duramente e decision y a cuestiona viabilidad di e gabinete minoritario.
Vice-premier Dilan Yesilgöz a declara cu e tin confianza den e proceso nobo, pero a enfatisa cu Gobierno mester asegura mayoria parlamentario pa su plannan financiero.
Apesar cu anteriormente tabata considera posibilidad di inclui e partido di derecha JA21 den Gobierno, e tres partidonan a dicidi di continua sin amplia e coalicion.