ORANJESTAD — Reportero y co-director di 24ora, Nelson “Speed” Cabral de Andrade, no mester drenta prizon despues cu Hof a cambia e pena di prizon imponi den prome instancia pa un pena completamente condicional den e caso conoci como “New York”, of e caso relaciona cu ‘radionan di polis’. Den nan decision, e hueznan a duna peso na e remordimiento cu Andrade a mustra durante e tratamento di e caso y na e impresion cu awor si el a siña su les y a compronde e consecuencianan di su actonan.
ACTITUD DI E ANDRADE
Segun e hueznan, e actitud di Andrade durante e tratamento a hunga un papel den nan evaluacion di e castigo. Hof a considera cu el a mustra arrepentimiento y cu el a compronde bon kico e consecuencianan por ta si e bolbe comete e mesun fout. P’esey, e hueznan no a mira motibo pa mantene e pena di prizon efectivo anterior. Hof a anula e sentencia di Corte di Prome Instancia relaciona cu e castigo y a cambia e pena di prizon incondicional pa uno completamente condicional.
REACCION ABOGADO
Su abogado Demis Illes a reacciona satisfecho cu e resultado. “Mi prome reaccion tabata cu mi tabata contento,” el a declara. Segun Illes, e decision ta cuadra cu e strategia di defensa pa evita cu su cliente mester drenta prizon. Den su reaccion, el a menciona tambe 240 ora di trabao comunitario. “Nada di prizon awor,” e abogado a subraya.
MINISTERIO PUBLICO
E decision ta diferente for di loke Ministerio Publico a solicita durante e tratamento di apelacion riba 26 di october. OM a exigi 18 luna di prizon, di cual seis luna condicional. Esaki lo a nifica cu Andrade mester a sinta 12 luna, compara cu e seis luna efectivo cu tabata inclui den e sentencia anterior. noticiacla.com
E CASO
E caso penal “New York” ta relaciona cu corrupcion y violacion di secreto di oficio rond di acceso na comunicacion confidencial di polis. E investigacion tabata cubri e periodo di januari 2021 te maart 2023 y tabata involucra un agente policial y cuatro periodista. Den e caso di Andrade, tanto e periodista como Ministerio Publico a apela.
Na december 2024, Corte di Prome Instancia a condena Andrade na 18 luna di prizon, di cual 12 luna condicional, cu un periodo di prueba di tres aña. Su condena anterior y e hecho cu e delitonan nobo a wordo comete durante su periodo di prueba a conta den e determinacion di e castigo.
Durante e caso di apelacion, defensa no a disputa e hechonan comproba di soborno di un funcionario y violacion di secreto di oficio hunto cu otro. E abogadonan a argumenta cu desde e registro di cas na maart 2023 Andrade no tabatin acceso mas na e sistema di comunicacion di polis y no a comete otro hecho similar. noticiacla.com
Defensa a pidi un pena di 18 luna completamente condicional, combina cu 240 ora di trabao comunitario y condicionnan estricto. Entre e condicionnan solicita tabatin un prohibicion pa tene of usa aparato cu por ricibi comunicacion di polis. E abogadonan a sostene cu un castigo asina lo tene Andrade responsabel sin cu e mester drenta prizon.
Illes a indica awe tardi despues di e sentencia cu ainda tin posibilidad pa presenta un recurso di casacion. E no a confirma si defensa lo haci uso di e posibilidad aki aunke cu e ta recomenda su cliente pa no haci esaki pasobra e sentencia ta loke cu nan a pidi p’e. Awor ta keda na ministerio publico, si nan ta bay casacion.