Crucero Sapphire Princess ta bishita Aruba pa prome biaha

ORANJESTAD — Aruba a ricibi dialuna mainta e barco di crucero Sapphire Princess, di Princess Cruises pa prome biaha, como parti di e temporada halto di crucero cu recientemente a cuminsa.

Representantenan di gerencia di Aruba Ports Authority (APA) a subi abordo di e barco pa duna e tripulacion un bonbini oficial y intercambia regalonan conmemorativo pa marca e prome bishita.

Sapphire Princess, construi na Hapon y entrega na Princess Cruises na mei 2004, tin un largura di aproximadamente 290 meter y capacidad pa 2.680 pasahero y alrededor di 1.100 tripulante.

E barco tin un historia particular. Originalmente e lo a carga nomber Diamond Princess, pero despues di un candela durante construccion na 2002, Princess Cruises a intercambia e nombernan di e dos barconan ruman pa mantene su programa di introduccion.

Aruba Ports Authority ta destaca e relacion comercial cu Princess Cruises y ta sigui explora oportunidadnan pa atrae mas bishita di su flota.

Durante november, Aruba ta ricibi varios barco di e compania, incluyendo Sapphire Princess, Caribbean Princess, Majestic Princess y Regal Princess, fortaleciendo e posicion di Aruba como destino di crucero den Caribe.