Caribe ta sostene reeleccion di Infantino cu aumento di fondo FIFA

ORANJESTAD — Caribbean Football Union (CFU) a anuncia cu su miembronan unanimamente ta sostene reeleccion di presidente di FIFA, Gianni Infantino, na maart 2027. E decision ta bin den un momento cu FIFA ta prepara un aumento significante di fondo pa desaroyo di futbol, di cual Aruba tambe por beneficia.

Durante un reunion na Santa Lucia, e 31 federacionnan di futbol Caribense, di cual 25 tin derecho di voto den eleccion presidencial di FIFA, a expresa nan sosten na Infantino. E organisacion a enfatisa importancia di asistencia financiero di FIFA pa mehora infrastructura deportivo y desaroyo di talento hoben.

Segun e plannan anuncia, e cantidad cu cada federacion miembro potencialmente por ricibi durante periodo 2027–2030 lo aumenta di 10 miyon pa 25 miyon dollar.

Pa Aruba, e desaroyo aki ta particularmente relevante. Durante un bishita reciente na e isla, Infantino a compromete casi 5 miyon euro pa construccion di siete cancha di futbol cu yerba artificial. E inversion por contribui na mehor facilidadnan deportivo y oportunidadnan pa hoben futbolistanan.

Sinembargo, e sosten unanime di Caribe ta lanta pregunta tocante independencia di federacionnan cu ta depende financieramente di FIFA. CFU mes a relaciona su sosten na Infantino cu e asistencia financiero cu su administracion ta ofrece. No tin indicacion, sinembargo, cu e aumento di fondo ta condiciona formalmente na sosten pa su reeleccion.

Mientras federacionnan Caribense ta expresa nan sosten, algun federacionnan Europeo, incluyendo KNVB di Hulanda, ta prefera un cambio di liderato debi na preocupacionnan tocante gobernacion y influencia comercial den futbol internacional.

Infantino ta presidente di FIFA desde 2016. E eleccion presidencial ta programa pa maart 2027.