InSight Crime: Aruba menciona como ruta di trafico di cocaine di ELN pa Europa

ORANJESTAD — Aruba ta figura como un di e islanan den Caribe cu ta wordo uza como ruta di transito pa cocaine cu ta sali for di Venezuela rumbo pa Europa. Esaki ta surgi for di un investigacion di InSight Crime, publica dia 8 di december 2025, tocante expansion di e grupo guerrillero colombiano Ejército de Liberación Nacional (ELN) den Venezuela y su participacion creciente den trafico internacional di droga. E prome cu a bin cu e raportahe aki ta e portal aruyba.nu

Segun e investigacion, ELN a amplia su control riba produccion, procesamiento y transporte di cocaine den region fronterizo entre Colombia y Venezuela. E grupo ta aprovecha di su presencia riba territorio venezolano pa organisa operacionnan di droga y facilita transporte internacional.

Aruba, Bonaire y Corsou ta wordo menciona especificamente como destinacionnan di transito. InSight Crime ta indica cu cargamentonan di cocaine ta pasa atraves di estado Zulia, Lago di Maracaibo y costa di Falcon na Venezuela, pa despues dirigi nan mes na e tres islanan. For di eynan, e droga por sigui su caminda pa mercado europeo.

E investigacion ta señala cu ELN a fortalece su posicion den region di Catatumbo na Colombia, un di e areanan mas importante pa cultivacion di coca. Presion militar di autoridadnan colombiano a contribui na traslado di parti di e operacionnan di e grupo pa territorio venezolano.

InSight Crime ta describi tambe un relacion di colaboracion entre ELN y sector di autoridadnan venezolano, unda corrupcion y pago pa proteccion ta facilita actividadnan criminal.

Pa Aruba, e revelacion ta particularmente relevante debi na su cercania geografico cu Venezuela y su posicion como punto di conexion maritimo y aereo cu Europa. E informacion ta subraya e riesgo cu retnan internacional di narcotrafico ta representa pa seguridad fronterizo y control di cargamento.

Sinembargo, e investigacion no ta identifica personanan, empresanan of organisacionnan specifico na Aruba como participante den e operacionnan di ELN. Tampoco e no ta presenta cifranan tocante cantidad di cocaine cu ta pasa via Aruba.

E investigacion ta pone enfasis riba con e expansion di ELN den Venezuela ta fortalece un corredor internacional di droga, den cual Aruba y e otro islanan ABC ta figura como posible punto di transito rumbo pa Europa.