Raad voor Cultuur ta alerta: periodismo independiente na Aruba ta vulnerabel

ORANJESTAD — Libertad di prensa y futuro di periodismo independiente na Aruba ta enfrenta menasanan serio, entre otro dependencia di social media, falta di recurso financiero, desinformacion y influencia di tecnologia moderno. Esaki ta surgi for di un informe di Raad voor Cultuur hulandes, titula ‘Vrije journalistiek, weerbare democratie’, den cual e organismo ta haci un yamada explicito na Gobierno di Aruba pa proteha y fortalece periodismo independiente.

Segun e informe, situacion di periodismo den e parti Caribense di Reino ta mas preocupante cu na Hulanda Europeo. E islanan tin un infrastructura periodistico limita, poco posibilidad di formacion profesional y un dependencia grandi di plataformanan manera Facebook pa distribui noticia.

E dependencia aki ta crea un problema economico serio. Mientras medionan di comunicacion ta produci informacion, plataformanan internacional ta controla distribucion y ta absorbe gran parti di e valor economico genera. Expansion di inteligencia artificial (AI) ta aumenta e presion, particularmente ora contenido periodistico ta wordo reproduci sin credito of compensacion.

E informe ta menciona Aruba specificamente, incluso e existencia di Red Arubiano di Prensa Profesional (RAPP), funda na 2024, como un excepcion den region cu ta promove ehecucion liber di periodismo y ta sigui normanan etico di Nederlandse Vereniging van Journalisten.

Un otro preocupacion importante ta influencia politico y desinformacion. Segun Raad voor Cultuur, e region Caribense ta vulnerabel pa campaña di desinformacion, incluso influencia for di Venezuela, China y Rusia. E organismo ta enfatisa cu periodismo independiente ta indispensable pa controla poder politico, informa comunidad y proteha democracia.

Raad voor Cultuur ta recomenda cu fortalecemento di periodismo den Caribe bira un tema oficial den e Vierlandenoverleg, e reunion entre minister di Hulanda, Aruba, Corsou y Sint Maarten.

E organismo ta propone investigacion riba apoyo financiero structural, formacion profesional, innovacion y fortificacion di medionan independiente. Sinembargo, e ta enfatisa cu cualkier sistema di apoyo mester funciona na distancia di Gobierno, pa evita influencia politico riba contenido periodistico.

Pa Aruba, e mensahe central ta cu libertad di prensa no ta depende solamente di derecho pa publica noticia. Ta depende igualmente di existencia di medionan financiero sostenibel, periodista profesional y un ambiente den cual prensa por investiga y controla Gobierno sin interferencia.

E informe ta conclui cu un periodismo debil ta pone funcionamiento di democracia na peliger, y cu proteccion di prensa independiente mester wordo considera un responsabilidad publico.