Legend of the Seas ta haci su prome bishita na Aruba cu capacidad pa 7.600 pasahero

Legend of the Seas ta haci su prome bishita na Aruba cu capacidad pa 7.600 pasahero

Posted on 11/19/2026, 2:59 PM AST | Updated on 11/19/2026, 3:00 PM AST

ORANJESTAD — Aruba Ports Authority (APA) a yama bonbini na e gigantesco crucero Legend of the Seas di Royal Caribbean durante su prome bishita na Aruba, dia 18 di november. E barco, un di e tres cruceronan mas grandi di mundo, a drenta waf di Oranjestad despues di lunanan di preparacion y coordinacion.

Legend of the Seas tin 2.805 cabina, capacidad pa aproximadamente 7.600 pasahero cu ocupacion maximo y un tripulacion di 2.350 persona. Segun APA, e barco tin tres bishita mas programa pa december, incluyendo un estadia di un anochi di 29 pa 30 di december.

CEO di APA, Marc Figaroa, a destaca cu Aruba ta un destinacion importante pa Royal Caribbean y cu e yegada ta un logro nobo pa e waf di Oranjestad, cu awor ta ricibi cruceronan di clase Icon.

Minister di Turismo Wendrick Cicilia a enfatisa e oportunidadnan economico pa comerciantenan di Oranjestad, taxistanan, operadornan di tour, restaurantnan y otro empresarionan local.

Durante e ceremonia inaugural, Royal Caribbean Group a dona US$20.000 na dos fundacion Arubiano dedica na conservacion marino: US$10.000 pa ScubbleBubbles Foundation y US$10.000 pa TurtugAruba. 

E barco, construi na Finlandia, tin un tonelahe bruto di 248.663 GT y ta comparti e prome posicion mundial den tamaño cu Icon of the Seas y Star of the Seas, basa riba volumen interno.