Nomber AIB Bank oficialmente riba edificio di ex-Banco di Caribe

Nomber AIB Bank oficialmente riba edificio di ex-Banco di Caribe

Posted on 11/16/2026, 6:32 AM AST | Updated on 11/16/2026, 6:33 AM AST

ORANJESTAD — E cambio di identidad di Banco di Caribe Aruba pa AIB Bank awor ta completamente visibel riba e edificio di e banco. Diasabra mainta trempan, 14 di november, e compania UTLT a instala e nomber nobo AIB Bank riba e edificio, marcando un otro paso den e transicion di e institucion financiero pa un banco comercial cu accionistanan 100% local. Diabierna atardi, personal di UTLT a prepara e ekiponan necesario pa e instalacion. Diasabra mainta nan a completa e trabao, despues cu algun dia prome a kita e nomber anterior di Banco di Caribe for di e edificio. Manera Noticiacla a informa anteriormente, AIB Bank a adquiri 100% di e accionnan di Banco di Caribe Aruba N.V. dia 23 di december 2024, despues di un proceso di negociacion y aprobacion di e autoridadnan regulatorio. 

CAMBIO DI NOMBER 

E cambio oficial di nomber a drenta na vigor dia 2 di november 2026, ora Banco di Caribe Aruba N.V. a bira AIB Commercial Bank N.V., operando bou di e marca AIB BANK. Cu esaki, e periodo di transicion durante cual e institucion a sigui uza e nomber y logo di Banco di Caribe a yega na su fin. 

SERVICIONAN BANCARIO TA SIGUI DURANTE TRANSICION

Pa clientenan, e cambio di identidad no ta nifica cu tur producto y servicio bancario ta cambia inmediatamente. Tarhetanan di debito y credito, e aplicacion movil y banca online lo sigui funciona temporalmente bou di e marca Banco di Caribe.

Segun informacion publica anteriormente pa Noticiacla, e cambio completo ta programa pa 2027, ora AIB ta proyecta di introduci su plataforma bancario central nobo. Mientrastanto, Banco di Caribe na Corsou lo sigui brinda asistencia tecnologico y servicio di procesamento di pago.