Coalicion Hulandes ta sigui negociacion pa evita ruptura

Coalicion Hulandes ta sigui negociacion pa evita ruptura

Posted on 11/16/2026, 6:42 AM AST | Updated on 11/16/2026, 6:42 AM AST

DEN HAAG — E partidonan D66, VVD y CDA ta reuni atrobe dialuna 16 di november, pa 11'or di mainta, na Catshuis na Den Haag, pa sigui negociacionnan tocante futuro di nan coalicion gubernamental. Esaki ta e di cuater dia di consulta di crisis, despues cu un conflicto serio tocante maneho di impuesto a pone cooperacion entre e tres partidonan bou di presion.

Durante fin di siman, e lidernan politico a reuni na landgoed De Zwaluwenberg na Hilversum, pero ainda no a anuncia ningun resultado concreto. E partidonan ta mantene silencio tocante contenido di e negociacionnan.

Segun informacion cu a surgi, e conversacionnan ta concentra riba un posibel continuacion di e coalicion, cu adaptacion di acuerdonan politico y eventualmente entrada di un otro partido den Gobierno.

E crisis a cuminsa despues cu D66 y CDA a yega na un acuerdo cu partidonan di oposicion Pro y Volt pa aumenta impuesto riba patrimonio cu un mil miyon euro y uza e entrada adicional pa baha impuesto riba ingreso.

VVD a rechasa e manera cu e acuerdo a wordo negocia, sin participacion di su lidernan. Apesar di oposicion di VVD, Parlamento Hulandes a aproba e plan di impuesto modifica diahuebs.

Premier Rob Jetten a declara cu ta necesario pa haya un solucion na nivel politico, di contenido y personal. Lider di VVD, Dilan Yesilgöz, a califica e gabinete minoritario como un “experimento faya” y ta exigi cambionan den e manera cu e coalicion ta funciona.

Durante e negociacionnan di fin di siman, aparentemente a discuti tambe un posibel ruptura of un continuacion sin VVD, pero segun e informacion disponibel, e opcionnan ey no ta mas e punto central di e conversacionnan.

Ainda ta incierto si e tres partidonan lo logra yega na un acuerdo pa mantene e Gobierno hunto.