Gasolin ta baha atrobe, pero ta ainda mas caro cu algun luna pasa

ORANJESTAD — Entrante diaranson 11 di november 2026, prijs di gasolin na Aruba ta baha cu 17,9 cen pa liter, despues di e aumento fuerte registra na october. Diesel tambe ta bira ligeramente mas barata, mientras cu kerosin ta subi.

Minister di Finansa, Asunto Economico y Sector Primario a anuncia e siguiente prijsnan nobo:

- Gasolin unleaded-premium: Afl. 2,945 pa liter (baha 17,9 cen).

- Diesel ULS: Afl. 3,362 pa liter (baha 1,4 cen).

- Kerosin: Afl. 3,186 pa liter (subi 6,7 cen).

Gasolin ainda mas caro cu na juli

Un comparacion cu publicacionnan anterior di Noticiacla ta mustra cu e bahada di november ta compensa gran parti di e aumento di october, pero no tur e aumentonan di ultimo lunanan.

Na juli, gasolin tabata costa Afl. 2,658 pa liter. Na augustus e prijs a subi pa Afl. 2,909, na september pa Afl. 2,918 y na october pa Afl. 3,124.

Cu e prijs nobo di Afl. 2,945, gasolin ta 28,7 cen pa liter mas caro cu na juli, pero solamente 2,7 cen mas caro cu na september. 

Pa un automobilista cu ta yena 50 liter di gasolin, e bahada di november ta representa un spar di Afl. 8,95 compara cu october. Sinembargo, e mesun tanki ainda ta costa Afl. 14,35 mas cu na juli.

Diesel ta registra un bahada minimo despues di e aumento fuerte di october, mientras cu kerosin ta sigui subi. E precio nobo di kerosin ta 62 cen pa liter mas halto cu na juli.

E cifranan ta mustra cu, apesar di e alivio di november pa automobilistanan, prijsnan di combustibel ainda ta considerablemente mas halto cu na principio di e serie di aumentonan durante zomer.

Tur e prijsnan ta inclui BBO, BAZV y BAVP.