Aruba Food & Beverage Association ta alerta pa costo di aumento di salario minimo

ORANJESTAD — Aruba Food & Beverage Association (AFBA) ta pidi Gobierno pa evalua cuidadosamente e plan pa subi salario minimo di Afl. 2.007,05 pa Afl. 2.683 mensual, e nivel di bestaansminimum. Aunke e asociacion ta reconoce cu trahadonan merece un salario digno, e ta alerta pa e consecuencia financiero riba negoshinan, empleo y prijsnan pa consumidor.

Segun calculonan di AFBA, e aumento por costa dunadonan di trabou aproximadamente Afl. 845 extra pa trahado pa luna, incluyendo gastonan adicional. Pa un empresa cu 50 trahado na salario minimo, esaki por representa mas cu Afl. 506.000 extra pa aña.

AFBA ta adverti cu negoshinan por bira obliga na subi prijsnan, limita contratacion of reduci personal. Ademas, trahadonan cu actualmente ta gana mas cu salario minimo por spera ahustenan salarial, aumentando e gastonan ainda mas.

E asociacion ta pidi Gobierno pa considera alivio fiscal, reduccion di contribucionnan social y implementacion gradual. Tambe e ta insiste cu Dialogo Social mester conduci na acuerdo real entre e partidonan involucra, en bes di bira solamente un formalidad.

Segun AFBA, e pregunta principal ta: ken lo paga e aumento? Un salario mas halto no necesariamente ta mehora poder di compra si costo di bida ta subi pareu. NOTA. Potret ta di archivo di noticiacla.