Registracion di vacation rentals ta habri 1 di november; periodo di tres luna

ORANJESTAD — Gobierno di Aruba lo habri e registracion oficial di Short-Term Vacation Rentals diadomingo 1 di november 2026, pa 12'or di merdia. Propietarionan y operadornan tin te cu 31 di januari 2027 pa registra nan acomodacionnan.

E registracion ta boluntario y no tin multa pa esnan cu no participa. Sinembargo, Gobierno ta encurasha registracion pa acomodacionnan existente por wordo evalua y eventualmente beneficia di un maneho temporal di tolerancia (tijdelijk gedoogkader).

E maneho aki ta permiti cu acomodacionnan cu tabata activo prome cu 1 di november, y cu cualifica, por sigui opera durante e proceso di evaluacion, bou di condicionnan aplicabel.

Registracion no ta nifica legalisacion automatico ni aprobacion di permiso. Cada propiedad lo wordo evalua individualmente, mientras cu un sistema obligatorio di registracion ta den preparacion.

Proyectonan cu ainda no ta opera, pero cu por demostra inversionnan of obligacionnan contractual significativo anterior na 1 di november, tambe por bin na remarca pa evaluacion.

Registracion ta disponibel via vacationrentalregistry.com.