Arnhem: Polis lo aumenta presencia riba caya y busca tur involucra den tironan

ORANJESTAD — Korpschef Ramon Arnhem a anuncia cu polis lo aumenta su presencia riba caya y intensifica trabou di inteligencia y investigacion, despues di varios incidente di tiro den e ultimo dos siman. Den e incidente fatal di e fin di siman, un mama di dos yiu chikito a perde su bida.

Na nomber di Cuerpo Policial Aruba, Arnhem a expresa condolencia na e famia, specialmente e dos yiunan. El a califica e acto como “teribel, cobarde y inaceptabel” y a reconoce e tristeza, rabia y inseguridad den comunidad.

Arnhem a subraya cu e investigacion ta dirigi tanto riba esun cu a tira e arma como riba tur otro persona involucra. El a sigura cu polis ta dedica tur esfuerzo pa identifica, localisa y detene e responsabelnan, y cu e violencia lo tin consecuencia.