Na Hulanda, Eman ta explora procesamento regional di sushi na area di refineria

ORANJESTAD — Prome Minister Mike Eman ta explora un cooperacion entre Aruba, Corsou, Boneiro y Hulanda pa modernisa maneho di sushi. Durante un bishita na empresa HVC na Alkmaar, el a conoci instalacionnan cu ta recupera material for di sushi y produci electricidad y calor.

Eman a menciona un posibel aliansa entre Serlimar, Selikor, Selibon, EcoTech y HVC. Un punto clave ta si e tres islanan hunto por genera suficiente volumen di sushi pa haci un instalacion moderno economicamente factibel.

E area di refineria na Aruba ta wordo considera como posibel ubicacion. E instalacion lo por separa sushi, recupera materia prima y transforma sushi cu no por recicla den energia, creando tambe actividad economico nobo.

E propuesta ta ainda den fase exploratorio. Tanto e cooperacion como e factibilidad y ubicacion di un eventual instalacion mester wordo investiga.