Obheto sospechoso dilanti Refineria di Aruba no tabatin explosivo

SAN NICOLAS — Un obheto sospechoso cu apariencia di un bom, haya diadomingo mainta pafo di e edificio di Refineria di Aruba (RDA), no tabatin material explosivo. Esaki a keda confirma despues di investigacion door di expertonan.

Pa mas o menos 6:26, central di polis a ricibi aviso di e obheto banda di un baki di mata. Un patruya a confirma e presencia di e artefacto y a cera e area como precaucion, mientras tabata warda expertonan di explosivo.

Altomando di KPA, Brandweer, Ambulance, CMO y Servicio di Desactiva Explosivonan di Defensa (EODD) a presenta na e sitio.

Despues cu a determina cu no tabatin explosivo, a habri e area bek pa comunidad y bishitantenan. Polis a enfatisa cu ta tuma casonan asina na serio y ta aplica tur precaucion necesario.