Polis ta investiga posibel conexion di auto horta cu asesinato na Pos Chikito

ROOI TAKI — Polis a confisca un Kia Rio horta cu posiblemente tin conexion cu e asesinato na Pos Chikito, cu a sosode diasabra madruga.

Diasabra mainta pa mas o menos 10:21, central di polis a ricibi aviso di un auto abandona banda di e caminda pa WELA na Rooi Taki. Na e sitio, polis a confirma cu ta trata di un Kia Rio raporta como horta pa joyriding.

E auto a wordo confisca pa investigacion adicional. Su posibel conexion cu e asesinato ainda ta bou di investigacion.

Recherche di San Nicolas ta sigui traha pa localisa e sospechoso of sospechosonan. Cuerpo Policial ta pidi cualkier persona cu informacion pa yama e tiplijn 11141. Informantenan por keda anonimo.